Da emoción á competencia explica o que fan nun centro de Primaria de Moaña para procurar a competencia lingüística do seu alumnado que ten como idioma materno o castelán. A clave está na emoción. un centro educativo que se implica en que o seu alumnado poida escoller en liberdadecal vai ser o seu idioma e para o que se precisa que as persoas teñan a capacidade real de falar e sentirse cómodas tanto na lingua materna como na galega, lingua natural e cooficial en Galicia. Ser competentes faranos realmente libres á vez de capaces de falar galego sen problema e cando queiran.
Porque non falamos a lingua que queremos, falamos a lingua coa que nos educan. De aí a importancia da educación en galego.
Cuestionario sobre o Capítulo 4
Supoñamos que hai catro persoas galegas e das catro persoas hai unha que non fala galego...
1- Por que falar en galego cando hai alguén que non o fala, NON é de mala educación?
Argumenta con alomenos tres razoamentos ben expostos unha resposta afirmativa, é dicir, non é de mala educación falar galego cando hai alguén que non o fala.
Cadea humana no Grove 12-XI-2012 (Foto de Vítor Mejuto)
Que che suxire esta fotografía? Que están facendo e quen a protagoniza? Que expresa para ti? A ver se acertas que pode simbolizar.
Algunha vez te preguntaches por que vivimos en sociedade? Por que o ser humano non pode vivir aillado e de costas ao outro? Cal é a clave para vivir en colectivo?
A resposta está na identidade.
Nesa procura do eu que comeza mesmo ao nacer, hai un camiño constante que nos vai descubrindo o mundo aos poucos, un mundo tan complexo e diverso que sempre haberá alguén alleo ao que achegarnos. Nese camiñar, por forza, caemos na conta de que a diversidade nos fai humanos e deste xeito axiña pasamos de estar na Casa a construír na paisaxe a nosa Terra, en base a nosa lingua, cultura e historia, unha personalidade na que o orixinal do nós, da nosa forma de ser nos abre as portas da universalidade. Trátase dun camiñar incesante e intrincado, intelixente e audaz no que se fai imprescindible practicar a empatía. Liberarse dos prexuízos cara aos demais implica saber mellor quen somos e ser empáticos tanto cun mesmo como con calquera distinto a nós. Apreciar o propio conleva coñecer a diferenza e valorar a variedade de idiomas e culturas como a nosa esencia.
A empatía será no camiño deste curso, a compañeira escollida como ferramenta para medrar. É unha compoñente que nos permite erguer o ser humano que transcende o eu, que repara no nós ineludiblemente incorporando o sentir do alleo. Coa empatía entenderemos que significa realmente a humanidade.
Como definirías o concepto da empatía?
Cres que este tema das nosas Tanxugueiras con Juancho Marqués ten algo que ver ou reflicte dalgunha maneira a empatía?
O Día das Letras Galegas celebrouse por vez primeira un 17 de maiod e 1963, xusto cena anos despois da saída da imprenta do primeiro libro en galego de Rosalía de Castro, titulado Cantares Gallegos.
Esta ano 2026 homenaxeamos neste Día das Letras a Begoña Caamaño. (1964-2014) Procuramos unha breve biografía na que destacamos tres facetas a de xornalista a prol do galego, a de activista feminista e escritora que recrea a mitoloxía grega e céltica.
Escribo para pensar o mundo que eu quero (Begoña Caamaño)
DA MITOLOXÍA GREGA
1- Resume o argumento da Odisea de Homero, considerada a primeira novela da literatura occidental escrita hai 2600 anos na Grecia Antiga. Un libro que Begoña coñeceu na súa infancia e ao que volveu para escribir a súa primeira novela Circe ou o pracer do azul.
2-Cantas mulleres aparecen citadas no argumento que acabas de atopar?
Begoña Caamaño vai colocar, pola súa profunda convicción feminista, nun primeiro plano, como as protagonistas absolutas da súa narrativa, a aquelas mulleres ás que Homero retratara na Grecia Antiga. O reto era grande e o resultado foi marabilloso.
RESUMO DA TRAMA DA NOVELA:
Circe ou o pracer do azul
...Unha muller leva once anos agardando polo retorno do seu home. Cando comeza a temer a problable morte do marido, recibe a carta dunha estraña, dunha muller misteriosa que a informa que o seu home non está morto, senón que vive con ela un romance apaixonado. A partir de aí vaise tecendo unha relación epistolar entre as dúas; o home dunha e amante doutra acábase convertendo só no pretexto que vai unir para sempre o destino das dúas mulleres...
3- Quen son, como se chaman, estas dúas mulleres?
4- Que nos contan os mitos gregos ou como chegaron ata nós estas dúas mulleres?
5- Como era a Penélope da literatura galega ata chegar á Penélope de Begoña Caamaño?
Pequeno traballo de investigación:
Da Penélope de Rosalía de Castro á Penélope de Begoña Caamaño, pasando pola de Xohana Torres.
